دوای رێگریكردنی نوێنەرانی كورد لە تێپەڕاندنی پرۆژەیاسای بودجەی گشتی لە دانیشتنەكەی ئەمڕۆی ئەنجومەنی نوێنەران، فراكسیۆنە كوردییەكان چاوەڕوانی كۆبوونەوە لەگەڵ عەبادی دەكەن، پەرلەمانتارێكیش رایدەگەیەنێت:” ئەگەر سەرۆك وەزیران راستگۆ نەبێت لەو رێككەوتنەی لەگەڵ فراكسیۆنە كوردستانییەكان كردویەتی، بەئاسانی رێگە بەتێپەڕبوونی بودجە نادەین و هەر دانیشتنێكیش بكرێت تێكی دەدەین.
نوێنەرانی كورد لەئەنجومەنی نوێنەرانی عیراق رێگرییان كرد لەتێپەڕاندنی پڕۆژەیاسای بودجەو بەوهۆیەشەوە دانیشتنەكە بۆ رۆژی یەكشەممە دواخرا.
مەسعود حەیدەر ئەندامی لیژنەی دارایی لەئەنجومەنی نوێنەرانی عیراق راگەیاند: ئەگەر حەیدەر عەبادی سەرۆك وەزیرانی عیراق راستگۆ بێت لەگەڵ فراكسیۆنە كوردستانییەكان و دانیشتنێكی تەكنیكی لەگەڵ ئەندامە كوردەكانی لیژنەی دارایی بكات، چارەسەرمان پێیەو دەیخەینەڕوو، ئەگەر راستگۆش نەبێت، بەردەوام دەبین لەبژاردەی رێگریكردن لەتێپەڕاندنی بودجەو چۆن ئەمڕۆ دانیشتنەكەمان تێكدا، هەر دانیشتنێكی دیكە بكرێت تێكی دەدەین.
وتیشی: “ئەو لیژنە هاوبەشەی بۆ چارەسەری موچەو پشكی كورد پێكهێنراوە هەڵنەوەشاوەتەوەو چاوەڕوانی عەبادی دەكەین بۆئەوەی وادەیەك دیاریبكات لەگەڵ شەخسی خۆی كۆبوونەوە بكەین”.
ئەندامەكەی لیژنەی دارایی دەڵێت: “ئەگەر پشكی كورد زیاد نەكرێت و مەرجەكەی سندوقی دراوی نێودەوڵەتی لەبارەی ناردنی 10 ترلیۆن دینار بۆ هەرێمی كوردستان، جێبەجێ نەكرێت، رێگە نادەین بودجە بەئاسانی بەبێ كورد تێپەڕێنرێت”.
